«Барселона» ҳимоячиси Жерар Пике Испания Ла Лигасидаги ҳакамлик борасида фикр билдирди.

"Яқинда собиқ арбитрлардан бири ҳакамларнинг 85 фоизи «Реал»га ён босиши ҳақида айтди. Қандай қилиб улар унинг («Реал»нинг) фойдасига ҳуштак чалмасин?! Ҳатто онгсиз равишда ҳам қандай қилиб улар бир жамоа фойдасига кўпроқ ҳуштак чалмасин?

Мен ҳакамларнинг профессионаллигини ҳурмат қиламан ва улар ўз ишини иложи борича тўғри бажаришга ҳаракат қилаётганини биламан, аммо шубҳали вазият юзага келиши билан...", — деди Пике.

Marca’нинг қайд этишича, Пике катта эҳтимол билан собиқ ҳакам Эдуардо Итурралде Гонсалеснинг 2020 йилда айтган гапларини назарда тутган. Ўшанда Гонсалес испаниялик ҳакамларнинг 90 фоизи «Реал»га, қолган 10 фоизи эса «Барселона»га ён босишини айтганди.

2020 йил ноябрь ойида жароҳат олган Пике ҳозирда тикланиш жараёнини бошдан кечирмоқда. У Испания чемпионатининг 2020/21 йилги мавсумида 8 та ўйин ўтказган.