Кеча Москванинг "Спартак" жамоаси БААда ўқув-машғулот йиғинлари доирасидаги иккинчи назорат учрашувини ўтказди. Москваликларга бу сафар Белорусия чемпиони, Солигорскнинг "Шахтёр" жамоаси рақиблик қилди.

Терма жамоамиз аъзоси Остон Ўрунов "Спартак" сафида майдонда тўлиқ ҳаракат қилди. Учрашув тенг курашлар остида бошланди. Ўйиндаги ҳисобни 25-дақиқада солигорсклар очишди. Бурчакдан узатиб берилган тўпни Филипенко боши билан дарвозага жойлаб қўйди. Шундан сўнг бироз фаолликни оширган "қизил-оқлар" кўплаб вазиятлар яратишди. Тайм ўрталарида Остон Ўрунов ўзига-ўзи имконият яратиб, дарвозабон билан бирга-бир вазиятга чиқиб кетди, аммо ўзи яратган имкониятда фойдалана олмади. У тепган тўп дарвоза устуни ёнидан ўтиб кетди. Москва жамоаси ҳам, "Шахтёр" яна кўплаб вазиятлар яратди, лекин 1-таймда бошқа гол урилмади.

Иккинчи бўлим бошлари яна тенг курашлар остида кечди. "Шахтёр" жамоаси кўплаб имкониятлардан фойдалана олмади. Иккинчи таймда ҳам фаол ҳаракат қилган Ўруновни шериклари қулай вазиятга чиқарди. Дарвозабон устидан ошириб тепган тўпга бироз аниқлик етишмади. 76-дақиқага келиб, қарши ҳужумга ўтиб кетган "Спартак"нинг ҳужумини Айртон гол билан якунлаб қўйди 1:1. 80-дақиқада Соболёв москваликларни ҳисобда олдинга олиб чиқишди — 1:2. Учрашувда бошқа гол урилмади.

Lulichki.net сайтининг мухбири ўйиннинг энг яхши футболчиси сифатида Остон Ўруновни эътироф этди.

"Учрашувнинг кўп қисмида "Спартак" ҳужумни ташкил этишда муаммоларга дуч келди. Аммо Ўринов асосий таркибда хавфли вазиятларга эга бўлган деярли ягона футболчи эди. Ҳа, Остон улардан фойдаланмади, аммо умуман ҳеч нарса яратмасликдан кўра имкониятга эга бўлиш ва гол урмаслик яхшироқдир. Ўрунов учрашувда тўлиқ ҳаракат қилди ва ёмон кўринмади. Бу нарса Остонни ижарага бериб юборилишдан сақлаб қоладими ёки йўқми, билмадиму, бироқ Ўрунов мураббийнинг кўрсатмаларини яхши бажарди", — дея изоҳ берди мухбир.