Мамлакат чемпиони ҳисобланган "Бунёдкор" кетма-кет иккинчи мавсумни "Машъал"га қарши ўйин билан бошлайдиган бўлди. Тошкент клуби вице-президенти Баҳром Давлатов бу борада ўз фикрлари билан ўртоқлашаркан, бўлажак ўйин ҳар иккала жамоа учун қизиқарли бўлишини айтиб ўтди.

"Ҳа, "Бунёдкор" бу йилги чемпионатни ҳам "Машъал"га қарши ўйин билан бошлайди. Фарқ шундаки, ўтган йил "Бунёдкор" Муборакда ўйнаганди, энди эса "Машъал" Тошкентга келади. Ўйлайманки, бу баҳс ҳар иккала жамоа учун ҳам қизиқарли кечади", деди Баҳром Давлатов.

"Бу йил ҳам чемпион бўлишни олдимизга мақсад қилиб қўйганмиз, шу боис чемпионатнинг ҳар бир ўйинини ютишга ҳаракат қиламиз. Лекин бу пайтга келиб "Машъал" ҳам анча кучайиб қолса керак. Ҳозир "Машъал" сафида бир нечта ёш ўйинчилар тўп суряпти ва улар "Бунёдкор" билан кечадиган баҳсда ўзларини кўрсатиш учун бор куч билан ҳаракат қилишади. Шундай экан, ўйиннинг қизиқарли ўтишига ишоняпман", деди "Бунёдкор" вице-президенти "Машъал" расмий сайтига берган интервьюсида.