Янги мавсумга Туркияда тайёргарлик кўраётган "Пахтакор" сафида жанубий кореялик ва япониялик футболчилар синовдан ўтишмоқда. Бу ҳақда клуб расмий сайти хабар бермоқда.
"Кечаги машғулотларда барча футболчилар тўлиқ иштирок этди. Машғулотларда кореялик Ли Си Индан ташқари япониялик Наоя Сибамура ҳам иштирок этди", деб ёзади "Пахтакор" расмий сайти. Сайтнинг баҳосига кўра, япониялик футболчи "кореялик ҳамкасбига нисбатан бир калла устун кўринмоқда". "Ҳар ҳолда, мураббийларнинг дастлабки таассурот шундай", деб қўшимча қилган клуб расмий сайти.
29 ёшли Наоя Сибамура профессионал фаолиятини 2005 йили, ўша вақтда Сингапур лигасида иштирок этган Япониянинг "Альбирекс Ниигата" клубида бошлаган бўлиб, ҳимоячи клуб сафида 26 учрашув ўтказган. Шундан сўнг 2007 йилдан 2010 йилга қадар Япония 2-дивизионидан тортиб Токио минтақавий лигасида иштирок этадиган бир қатор жамоаларда тўп сурган ("Ависпа Фукуока" (2007), "Токусима Вортис" (2008), "Гайнаре Тоттори" (2009-2010), "Фудзиэда" (2010)).
Футболчи 2011 йилнинг 4 март куни Латвиянинг "Вентспилс" жамоаси билан бир йиллик шартнома имзолаган. Мавсум якунларига кўра у Латвия чемпиони ва Латвия Кубоги соҳибига айланди.
"Пахтакор" расмий сайти маълумотига кўра, шу кунларда жамоа ихтиёрига яна бир осиёлик - жанубий кореялик футболчи келиб қўшилиши керак. У ҳам бошқа осиёликлар каби синовдан ўтади.
Эслатиб ўтамиз, "Пахтакор" легионерларнинг 3+1 лимити бўйича осиёлик бўлмаган футболчилар (Боян Миладинович, Каха Махарадзе, Санибал Ораховац) билан шартнома имзолаб бўлган.
