“Интер” ниҳоят ўз ўйинини топган кўринади. Аслида бу янгилик эмас, бугунгача миланликлар А Серияда кетма кет тўрт ўйинда ғалаба қозониб келишаётганди. Бугун бешинчи ғалаба нишонланди. Бешта гол билан. Рақибнинг анойи эмаслигини эътиборга олсак, Раньери шогирдлари ҳақиқатан ҳам юқори савиядаги футбол намойиш эта олишди.

Ушу мавсумда ўйини қовушмаётган Милитонинг ҳам бенефис кечасига айланди бу оқшом. Ҳужумчи 13-дақиқада ҳисобни очди. Орадан беш дақиқа ўтар ўтмас, Тиаго Мотта ҳисобни 2:0 га етказди. Биринчи таймнинг охирларида эса Майконнинг қанотдан ҳужумга қўшилиши ҳисобни йирклашишига олиб келди. Гол муаллифи яна Диего Милито.

Иккинчи таймда меҳмонларнинг ниманидир ўзгартиришга қилган ҳаракатлари ўхшамади. Диего Милито бу сафар ҳужумдаги шеригини ҳам қуруқ қўймади. Паццини – 4:0. Охирги гол эса, айнан Милитонинг ўрнига тушган Фараонининг ҳисобига ёзилди.

“Интер” бу ғалабадан сўнг очколар сонини 29 тага етказди ва тўртинчи ўринда бораётган “Лацио”га деярли етиб олди.

ИНТЕР – ПАРМА 5:0 (3:0)
Голлар: 1:0 – Милито (13), 2:0 – Т. Мотта (18), 3:0 – Милито (41), 4:0 – Паццини (56), 5:0 – Фараони (79).
ИНТЕР: Жулио Сезар, Нагатомо, Самуэл, Лусио, Майкон, Х. Дзанетти, Альварес (Коутиньо, 72), Т. Мотта, Камбьяссо (Поли, 57), Милито (Фараони, 76), Паццини.
ПАРМА: Миранте, Дзаккардо, Палетта, Брандау, Модесто (Пелле, 55), Галлоппа (Мусаччи, 68), Морроне (Д.Перейра, 60), Жовинко, Гобби, Флоккари, Биабиани.
Огоҳлантиришлар: Самуэл (23), Галлоппа (30).