Бугундан Европа майдонларига катта футбол қайтади. Яна стадионлар узра Чемпионлар Лигаси мадҳияси янграйди. Қизиқарли учрашувлар билан биргаликда, гранд жамоалар ўртасидаги шиддатли баҳсларга ҳам гувоҳ бўламиз. Ҳозирги кунда ўз чемпионатида иккинчи рақамли жамоа сифатида ўйнаётган икки жамоа, "Лейпциг" ва "Ливерпуль" баҳсини ҳам худди шундай учрашувлар қаторига қўшсак бўлади. Мазкур икки жамоа ўртасидаги қизиқарли фактлар, жамоа янгиликлари ва эҳтимолий таркиби ҳақидаги қисқача превьюни сизларга тақдим этамиз.
"Лейпциг"
Гуруҳ босқичига қуръа ташланган пайтда "Лейпциг" жамоаси жуда қийин гуруҳга тушиб қолди. Улар «ПСЖ», "Манчестер Юнайтед" ва Истанбулнинг "Башакшеҳир" жамоалари билан плей-офф учун курашишига тўғри келди. Ўтган мавсумда ЕЧЛ ярим финалигача етиб борган германияликлар бу тасодиф эмаслигини исботлаб қўйиш учун ҳам, мазкур ўлим гуруҳидан тирик чиқиши талаб этилар эди. Гуруҳ босқичида Юлиан Нагельсманн шогирдлари ўтган йилги ярим финалдаги мағлубият учун «ПСЖ» жамоасидан қасос олган бўлса, ҳал қилувчи 6-турда "Манчестер Юнайтед"ни мағлубиятга учратиб, 1/8 финал босқичига йўлланмани қўлга киритишган. Шундай қилиб, немис жамоаси 12 очко тўплаб, «ПСЖ» жамоаси билан бирга кейинги босқичга йўл олишди.
Жамоа янгиликлари, йўқотишлар ва натижалар
"Лейпциг" жамоасида деярли ҳар бир ўйинчи гол уриши мумкин. Тўпурарлар жадвалига эътибор берсангиз, "буқалар сафидан ҳеч қайси футболчи ЕЧЛда 3 тадан кўп гол урмаган. Немис жамоаси сафида гол уриши мумкин бўлган 15 нафар футболчи борлиги бугунги учрашувда уларнинг фойдасига ишлаши мумкин. Бундеслигада ҳам Нагельсманн жамоасида яққол ажралиб турадиган тўпурар йўқ. Поулсен ҳисобида 9 та, чап қанот ҳимоячиси Анхелиньо ҳисобида 8 та гол мавжуд. Қолган кўпгина ўйинчиларда ҳам бешта, учта, тўртта гол мавжуд. Умуман олганда, германияликлар сафида ҳужумчидан тортиб, ярим ҳимоячилар ҳам, ҳимоячилар ҳам гол уришади. Бу ҳолат эса ҳимоячилари билан боғлиқ муаммога учраган "Ливерпуль" жамоасини қийин аҳволга солиб қўйиши мумкин. Ҳозирги пайтда кўпгина клубларни жароҳат билан боғлиқ муаммо қийнаб келмоқда ва бу ҳолат "Лейпциг" жамоасини ҳам четлаб ўтмаган. Ҳужумчи Эмил Форсберг январь ойи охирроғида жароҳат орттириб олган эди. Катта эҳтимол билан мазкур ушбу футболчи бугунги учрашувни ўтказиб юборади.
Стадион билан боғлиқ муаммолар
Коронавирус сабабли бугунги учрашув Германияда ўтказилмайди. Буюк Британияда вируснинг янгича тури аниқланганлиги сабабли, бу икки давлат ўртасидаги ҳар қандай авиақатновга чек қўйилди. Шошилинч равишда "буқалар" раҳбарияти авиақатнов бўйича Германия ҳукуматига мурожаат қилишади, аммо немислар ҳукумати бунга рухсат беришмайди. Агар 8-февралгача учрашув ўтказиладиган майдон ҳақида УEФАга хабар бермаса, уларга техник мағлубият ёзилиши ҳақидаги янгиликлар пайдо бўлди. Бу муаммога УEФА ҳам аралашди. Уларнинг олдида ўйин ўтказиш учун бир нечта вариант бор эди. Лондон, Сочи ва Будапештдаги стадионлардан бири мазкур учрашувга мезбонлик қилиши талаб қилинарди. Бир ҳафта олдин УEФА учрашув Венгрия пойтахти Будапештда жойлашган "Пушкаш Арена"да ўтказилиши ҳақида хабар берди. Ҳозирча жавоб учрашуви ўтказиладиган стадион ҳам номаълумлигича қолмоқда. Норасмий маълумотларга қараганда, англияликлар ҳам бошқа мамлакатда ўтказиш вариантини кўриб чиқмоқда.
"Ливерпуль"
"Ливерпуль" жамоаси эса гуруҳда "Аталанта", "Аякс" ва "Мидтюллан" жамоалари билан бирга жой олади. Англияликлар дастлабки 3 турда 9 очко қўлга киритиб, гуруҳ етакчисига айланиб олишади. Кейинчалик, "Аталанта"дан "Энфилд"да қабул қилиб олинган мағлубият, "Аякс" устидан қозонилган ғалаба ва Даниядаги дуранг билан 13 очко қўлга киритади ва плей-офф йўлланмасига эга чиқишган.
Йўқотишлар ва янгиликлар
Англияликларда ҳимоя билан боғлиқ муаммо ҳалигача давом этмоқда. Шу муаммони ҳал қилиш мақсадида қишки трансферлар вақтида мерсисайдлар иккита марказий ҳимоячи сотиб олди. Улардан бири дебютини яқинда амалга оширган бўлса, яна бири жароҳат олди. Ҳимоячиларининг жароҳат олиш эпидемияси яқинда сафга қўшилган Бен Девисни ҳам четлаб ўтмади. "Лестер"га қарши ўйинолди машғулот пайтида жароҳатланганлар рўйхатига Девис ҳам қўшилди.
Умуман олганда, айни пайтда "қизиллар" сафида 9 нафар футболчида жароҳат бор ва улар мазкур ўйинни ўтказиб юборади. Девисдан ташқари, "Ливерпуль" сафида Жеймс Милнер, Дивок Ориги, Виржил ван Дейк, Наби Кейта, Диого Жота, Фабиньо, Жо Гомес ва Жоел Матип каби футболчилар жароҳатини тузатиш билан овора бўлиб юрибди. Юрген Клопп "Лестер"га қарши ўйинда Жордан Хендерсон ва Озан Кабак жуфтлигидан марказий ҳимояни шакиллантирди. бугунги ўйинда Фабиньонинг майдонга тушиш эҳтимоли бор. Агар, бразилиялик майдонга қайтса, Хендерсон билан ажойиб марказий ҳимоя жуфтлиги пайдо бўлиши мумкин. Кузатамиз.
Ички муаммолар
Бир пайтлар бразилиялик дарвозабон Алиссон билан шартнома имзоланиши "Ливерпуль" учун катта муваффиқият сифатида қаралган эди. Ўзига берилган ишончни ортиғи билан бажариб беришга ҳаракат қилаётган бразилиялик, АПЛ охирги турларида қўпол хатога йўл қўймоқда. "Манчестер Сити"га қарши учрашувда қилган иккита хатоси, якунда 1:4 ҳисобидаги мағлубиятга сабаб бўлганди. Ўтган ҳафтадаги "Лестер"га қарши учрашувда шундай воқеа яна содир бўлди. Тўпга чиқишда хатога йўл қўйди, Жейми Варди эса вазиятдан унумли фойдаланиб кетди. Дарвозабоннинг хатолари бор, аммо шуни адолатли равишда таъкидлаш керакки, нафақат Алиссон фаолиятидаги қийин даврни бошдан кечирмоқда, балки "Лестер"га қарши учрашувда ўнг қанот ҳимоячиси Трент Александр-Арнолд 45 марта тўпни йўқотиб қўйди. 128 марта тўпга тегинган бўлса, шулардан ярмини шерикларига аниқ етказиб берди.
Инглизларнинг таркибидаги йўқотишлар даражаси 35,2 фоизни ташкил этди, бу Европадаги 5 та энг яхши лигалар ичидаги энг ёмон кўрсаткич ҳисобланади.
Умуман олганда, "қизиллар"нинг ёмон ўйинига фақат бир нечта ўйинчилар эмас, балки бутун жамоанинг ишончсиз ўйини ва жароҳатлар муаммоси сабабилигини таъкидлаб ўтиш лозим.
Эҳтимолий таркиблар
"Лейпциг" (3-5-2): Гулачи, Клостерм, Упамекано, Мукиеле, Анхелино, Олмо, Кампл, Забитзер, Адамс, Нкунку, Поулсен.
"Ливерпуль" (4-3-3): Алиссон, Робертсон, Фабинё, Хендерсон, Арнолд, Алкантара, Вейналдум, Жонс, Мане, Фирмоно, Салоҳ.
Хулоса ўрнида шуни айтишимиз мумкинки, "Лейпциг" ҳам, "Ливерпуль" ҳам ҳужумни севадиган жамоа ҳисобланади. Шундан келиб чиқиб хулоса чиқарамизки, бугунги учрашув голларга бой ва қизиқарли ўтиши тайин. Учрашув Тошкент вақти билан 16-февралдан, 17-февралга ўтар кечаси тунги 01:00да бошланади.
Жамшиджон Маҳмудов тайёрлади.
