Александр Шадриннинг "Навбаҳор"да қолиш-қолмаслиги ҳали тўлиқ ҳал этилмаган. Бу ҳақда "Навбаҳор" расмий сайти хабар бермоқда.

Клуб расмий сайти хабарига кўра, жамоани Жамол Отақулов ва Жасур Бобоев тарк этган. "Локомотив" қўшилиши кутилган Почуев ҳам "Навбаҳор" билан янги шартнома имзолаган. 2011 йилги мавсумнинг иккинчи ярмида "Машъал"дан ижарага олинган Қаҳрамон Маҳаммаджонов ҳам "Навбаҳор"га қайтган. Жамоа машғулотларида, шунингдек, Шерзод Раимжонов ва грузиялик Лаша Генгашвили иштирок этмоқда.

"Айни пайтда клуб раҳбарияти яна бир қатор футболчилар билан музокаралар олиб бораётганлигини ҳам айтиб ўтиш жоиз. Мураббийлар жамоа манфаатларидан келиб чиққан ҳолда уларнинг номларини сир тутишмоқда", дейилади клуб расмий сайтидаги хабарда.

Ўтган мавсум "Навбаҳор" шарафини ҳимоя қилган Рўзимбой Аҳмедов ("Пахтакор") ва Александр Шадрин ("Машъал") масаласи тўлиқ ҳал этилмаган.

"Навбаҳор" навбатдаги йиғинини 21 январдан 3 февралга қадар Тошкентда ўтказади. Айнан пойтахтдаги машғулотлар чоғида мураббийлар ўртоқлик учрашувларини ташкил этиш орқали футболчиларнинг ҳолати борасида керакли хулосага келишади. "Жамоанинг 4-18 феврал оралиғидаги йиғини эса Туркияда ташкил этилади", дейилади "Навбаҳор" сайтидаги хабарда.