Ўзбекистон аёллар терма жамоаси “Festival Women’s Trophy 2021” халқаро турнирининг навбатдаги турида Нигерия вакилларига қарши майдонга тушди.

1991 йилдан буён Жаҳон чемпионатининг мунтазам иштирокчиси ва Африканинг 11 карра чемпиони ҳисобланган нигерияликлар билан ўтган бугунги баҳс, кутилганидек, қизиқарли кечди.

Халқаро тажрибага эга Африка жамоасига қарши футболчиларимиз майдоннинг ҳар бир чизиғида кураш олиб борди ва муносиб ўйин намойиш этди. Бироқ иккинчи бўлим аввалида рақиб ҳужумчиси йўллаган зарба дарвозамиз тўридан жой олди. Ўйиннинг қолган вақтида ҳамюртларимиз бор эътиборини ҳужум чизиғига қаратди. Футболчиларимизда ҳисобни тенглаштириш учун бир қанча қулай вазиятлар юзага келди, бироқ уларга омад етишмади. Натижада рақиб жамоа вакиллари кичик 1:0 ҳисобида ғалаба қозонди.

Аёллар терма жамоамизнинг асосий мақсади Осиё кубоги саралаш беллашувларига юқори даражада тайёргарлик кўриш ҳисобланади. Шу сабабли, дунёнинг кучли жамоаларига бир қатор халқаро учрашувларни ташкил этиш терма жамоамизнинг тайёргарлик режасидан ўрин олган.

Анталияда ўтаётган “Festival Women’s Trophy 2021” халқаро турнирининг сўнгги турида Ўзбекистон аёллар терма жамоаси Россиянинг ЦСКА клуби билан тўқнаш келади. Мазкур ўйин 23 февраль куни Ўзбекистон вақти билан соат 14.00 да “Emir Hotels” спорт мажмуасида старт олади.