Мадриднинг "Реал" жамоаси собиқ ҳужумчиси Роналдо "Сантос" ҳужумчиси Неймар "Олтин тўп"ни қўлга киритиши учун нима қилиши кераклигини айтиб ўтди. Бу ҳақда Бразилия нашрлари хабар бермоқда.
Эслатиб ўтамиз, Наймар томонидан Бразилия чемпионатининг 12-турида "Фламенго" дарвозасига киритилган гол ФИФА томонидан 2011 йилнинг энг чиройли голи сифатида тан олинди.
"Неймар жуда ҳам катта иқтидорга эга ва Бразилиядан ташқарида ҳам ўйнай олади. Уни мамлакатда ушлаб қолиш худбинлик бўларди. Рақобатбардош футболчи бўлиш учун Европада тўп суриш жуда ҳам муҳим", деди 2002 йилги жаҳон чемпиони.
"Европа клубларида ўйнамоқчи бўлгани учун Неймарни Бразилияда танқид қилишди. Аммо ҳар бир инсоннинг шахсий фикрига ҳурмат билан муносабатда бўлиш керак. "Олтин тўп"ни қўлга киритиши учун Неймар Европада ўйнаши шарт", дея қўшимча қилди Роналдо.
2011 йил якунларига кўра жаҳоннинг энг яхши ўйинчиси сифатида ФИФА Аргентина терма жамоаси ва "Барселона" ҳужумчиси Лионель Мессини тан олди. Месси кетма-кет учинчи марта жаҳоннинг энг яхши футболчиси деб топилди.
