Мадриднинг "Реал" клуби ярим ҳимоячиси Анхель ди Мария Қироллик клуби билан ўз шартномасини узайтириш борасидаги ҳатти-ҳаракатлардан норозилигини яширмаяпти. "Реал"да йилига 2 миллион евро миқдорида маош оладиган аргентиналик футболчи ўз шартномасини узайтиришни ва йиллик маошини оширишни талаб қилмоқда. Аммо, клуб деярли бир йилдан бери футболчи билан янгидан музокара бошлашни ортга суриб келмоқда.
Marca нашрининг хабар беришича, футболчи ва клуб ўртасида янги шартнома имзоланмаса, 23 ёшли футболчи қишда бошқа жамоага ўтиб кетишга тайёр экан. Испан нашрининг маълум қилишича, футболчининг трансферини сотиб олиш учун Лондоннинг "Челси" жамоаси тайёр турибди. Лондонликлар футболчи учун 42 миллион евро ҳамда йилига 3.5 миллион евро миқдоридаги маош таклиф қилишаётгани ҳақида маълумотлар бор.
Таъкидлаш жоизки, аргентиналик футболчи жорий мавсусда "Реал"нинг энг яхши ассистентларидан бири бўлиб турибди. Ди Мария 14 учрашувда иштирок этиб. жамоадошларига 13 бора аниқ тўп узатган. Шунингдек 4 маротаба рақиб дарвозасини ҳам ишғол қилган.
