“Matchworl Cup Dubai 2012” турнири “Бунёдкор” ва “Зенит” жамоалари ўртасидаги баҳс билан бошланади.

Ушбу учрашув Ўзбекистон ва Россия чемпионларининг иккинчи тўқнашуви сифатида қайд этилади. Ўзаро биринчи баҳс 2010 йилнинг 29 январь санасида, эътиборлиси айнан Дубайда ташкиллаштирилган мавсумолди ўқув-йиғин машғулотлари доирасида кечганди. Ўшанда “Зенит”нинг италиялик легионери Алессандро Розинанинг пенальтидан киритган ягона голи питерликларга минимал ҳисобдаги ғалабани келтирганди.

“Matchworld Cup Dubai 2012” турниридаги илк рақибимиз бўлмиш Санкт-Петербургнинг “Зенит” клуби билан яқиндан таништириб ўтамиз.

“Зенит” (Санкт-Петербург)
Ташкил топгани йили: 1925 йили, 25 май
Стадиони: “Петровский” (21838 мухлисга мўлжалланган)
Веб-сайти: www.fc-zenit.ru

Эришган ютуқлари:
Россия чемпиони – 2007, 2010
Вице-чемпиони – 2003
Бронза медаллари соҳиби – 2001, 2009
Россия кубоги соҳиби – 1998/99, 2009/10
Финалчи – 2001/02
Россия суперкубоги соҳиби – 2008, 2011
УЕФА кубоги соҳиби – 20007/08
УЕФА суперкубоги соҳиби – 2008
Интертото кубоги финалчиси – 2000

2011 йилдан бошлаб Россия чемпионати куз-баҳор тизимига ўтганлиги боис, 2011 йили стартга чиққан чемпионат жорий йилнинг баҳоригача чўзилган. Айни пайтда питерликларнинг мусобақа жадвалида якка пешқадам бўлиб туришибди.

2009 йилнинг 11 декабридан бошлаб “Зенит”га италиялик машҳур мутахассис Лучано Спалетти устозлик қилиб келмоқда. Ўшанда, Спалетти ва "Зенит" ўртасидаги битим уч йилга тузилганди. Яқинда эса бу келишиб яна икки йилга узайтирилди. Спалетти бошқарувида питерликлар 64та учрашувда майдонга тушишган: 42та ғалаба, 14та дуранг ва 8та мағлубият.

Ушбу мавсумда "Зенит" Чемпионлар лигаси турнирида муваффақиятли одимламоқда. Спалетти жамоаси 1/4 финал йўлланмаси учун Португалиянинг "Бенфика" клуби билан кураш олиб боришади.

Ҳозирги кунда Санкт-Петербург жамоасида 11 нафар легионер футболчи мавжуд. Булар – Юрий Жеванов (дарвозабон, Белорусь), Бруно Алвеш (ҳимоячи, Португлия), Доменико Кришито (ҳимоячи, Италия), Николас Ломбартс (ҳимоячи, Бельгия), Александр Лукович (ҳимоячи, Сербия), Томаш Губочан (ҳимоячи, Словакия), Микаэль Ламб (ҳимоячи, Дания), Мигель Данни (ярим ҳимоячи, Португалия), Алессандро Розина (ярим ҳимоячи, Италия), Саболч Хусти (ярим ҳимоячи, Венгрия), Данко Лазович (ҳужумчи, Сербия).

Клуб шарафини терма жамоага номзод бўлган бир қатор футболчилар - Вячеслав Малофеев, Александр Анюков, Игорь Денисов, Константин Зирянов, Роман Широков, Александр Бухаров, Сергей Семак, Александр Кержаков ва бошқалар.