Январнинг 6-санасида бўлиб ўтган дастлабки учрашувда Жонаснинг 33-дақиқада киритган ягона тўпи шарофати билан ғалаба қозонган "Валенсия" жавоб учрашувида эҳтиёткорлик билан тўп сура бошлади.
Энг яхши ҳимоя — ҳужум ақидасига асосланиб ўйнай туриб, рақибнинг хатосини кутган валенсияликларга 66-дақиқада омад кулиб боқди. Марказий чизиқдан бўш зонага жуда чиройли пасни қабул қилиб олган Солдадо 15 метрлардан зарба бера туриб, тўп ва дарвозабонни икки томонга ажратиб ташлади.
Бу "Валенсия"нинг чорак финалга чиққанидан далолат эди. Қолган дақиқаларда "Севилья" учта гол киритишга маҳкум этилди. Дунёнинг манаман деган клублари учун ҳам қийин вазифа, "Севилья"га йўл бўлсин... – деган фикр келарди хар қандай мухлисларнинг хаёлига. Бироқ...
Бироқ, орадан 5 дақиқа ўтгач мезбонлардан майдонга тушганига эндигина 7 дақиқа бўлган Ракитич умумий ҳисобни қисқартирди. Касереснинг 27 метрлардан берган зарбасидан сўнг Диего Алвес тўпга чиқишда хатога йўл қўйди ва Ракитич бўш қолган дарвозани ишғол этди.
Ўйин асосий вақтининг сўнгги дақиқасида Ракитич дарвоза томон зарба берди. Тўп йўл-йўлакай Руиснинг елкасига тегиб, дарвозабонни лақиллатганча тўрга бориб тушди — 2:1! Турнир нуқтаи назаридан қаралганда етарли бўлмаган, мухлисларни овутишгагина ярайдиган ғалаба...
Қолган дақиқалар ўта асабий муҳитда ўтган бўлса-да, мезбонлар бошқа гол киритишнинг уддасидан чиқа олишмади. "Валенсия" — чорак финалда! Улар шу ойнинг 18 ва 25 саналарида "Леванте" билан учрашади. Яна дастлабки ўйин "Валенсия" майдонида ўтишини алоҳида қайд этиб қуйинг.
СЕВИЛЬЯ – ВАЛЕНСИЯ 2:1 (0:0)
Голлар: Ракитич (71), Руис (90-автогол) – Солдадо (66)
Огоҳлантиришлар: Фернандо Наварро (19), Мартин Касерес (60), Ракитич (82) - Мигель (13), Давид Альбелда (22), Адиль Рами (37), Жерими Матьё (54), Софьян Фегули (82), Альба Хорди (83), Диего Алвес (90)
Дастлабки учрашув: 0:1
