"Ювентус" клуби ЕЧЛдан чиқиб кетганидан сўнг, клуб ўз юлдузи Криштиану Роналдуни сотишга қарор қилди. Нарх ҳам жуда баланд эмас. Пандемиядан сўнг клуб молиявий жиҳатдан анча қийинчиликларга дуч келди ва энди клубда Роналдуни сақлаб қолиш учун маблағ йўқ. "Кекса сеньора"га португалиялик келганидан сўнг клуб ЕЧЛ совринини ютиш учун яққол даъвогар сифатида қаралаётганди. Аммо клуб 3 йилдан бери хатто ярим финалга ҳам бора олмади. Криштиану жамоани тарк этган тақдирда, қайси жамоа уни ўз сафига қўшиб олиши жуда қизиқ бўлади. Бир қатор жамоалар супер юлдуз учун курашиши аниқ. Демак, Роналду ўтиши мумкин бўлган жамоаларга тўхталиб ўтамиз.
"Реал Мадрид"
Роналду 2018 йили "қироллик клуби"ни жамоа тарихидаги энг яхши тўпурар сифатида тарк этган. 3 йил аввал Зидан Роналдуни клубдан кетишига қарши бўлган ва якунда ўзи "Реал" мураббийлигидан воз кечган. Айни вақтда яна "қаймоқранглилар" мураббийи бўлиб турган Зидан Криштиануни қайтишига қарши эмас.
Футболчининг ўзини ҳам бу клуб билан жуда кўп нарсалар боғлаб туради. Унинг оиласи ҳам Мадридда яшашни хоҳламоқда. Роналду кетгач клубда уни ўрнини ҳеч ким боса олмади. Бейл ўзидан кутилган даражани кўрсата олмади. 2019 йилда келган Азар эса жароҳатлардан боши чиқмаяпти. Бу факторлар португалияликнинг "Реал" билан яна ҳамкорлик қилишига олиб келиши мумкин.
"ПСЖ"
Катта юлдузни ўз сафига қўшиб олиш учун "ПСЖ" ҳар доим даъвогар ҳисобланади. Парижликлар ҳар доим юлдуз футболчиларнинг тажрибасини қадрлашган. Буффон ҳам Париж клуби сафида асосий таркибда ўйнаган. Леонардо Роналду билан шартнома имзолаши мумкин, аммо бу клубнинг устувор вазифаси эмас. Клуб Неймар ва Мбапе билан шартномани узайтирмоқчи ва кўпроқ Месси билан шартнома имзолашни хоҳлайди. Аргентиналик ҳозирда "Барселона" билан шартнома имзолаш арафасида. Шундай экан, португалиялик "ПСЖ"га ўтиш эҳтимоли сақланиб қолмоқда.
"Манчестер Юнайтед"
Роналду 3 йил олдин "Реал"дан кетган бўлса, 12 йил олдин "Олд Траффорд"ни тарк этган. Ўша пайти у дунёнинг энг қиммат футболчисига айланган эди. "Қизил иблислар" уни қайтаришга бир неча бор уриниб кўрди, аммо барчаси муваффақиятсизлик билан тугади.
Юнайтед ёзда яхши форвард қидирмоқда. Сулшер Холландни ўз сафига қўшиб олишга ҳаракат қилса ҳам, клуб у учун асосий даъвогар эмас. Шунинг учун Роналду яхши вариант бўлиши мумкин. Португалияликнинг голлари ва чемпионлик менталитети жамоага фойда келтириши мумкин.
МЛС
Роналдунинг шу мавсум якунида МЛСга йўл олишига ишониш қийин. Аммо Европада фойдали таклифлар бўлмаса ва Бекхэм Криштиануни ўз режаларигп ишонтира олса, бу вариант ҳам бўлиши имконсиз ҳолат эмас. Лекин Роналду океан ортидаги ҳаёт ва иқлим қандайлигини яхши билади. Португалиялик ҳам МЛСда ўйнаш ўзи учун қизиқарли бўлишини аллақачон таъкидлаб ўтган.
"Ювентус"
Роналдонинг "Ювентус" билан шартномаси ҳали бор ва нарсаларини йиғиштиришга ҳали эрта. Криштиану ёзда ўзига мос таклиф келиб тушсагина клубни тарк этади. Бундай бўлмаган тақдирда, футболчи жамоада қолади ва "кекса сеньора" билан ЕЧЛ ютиш учун яна бир бор уриниб кўради. Бундан ташқари, ҳамма клуб ҳам португалиялик юлдузнинг маошини тўлай олмайди ва бундай шароитда голеадорнинг жамоада қолиш эҳтимоли анча юқори.
Тирик афсона, ҳақиқий голеадор ва енгилмас характер эгаси қайси жамоага ўтса ҳам ёки "Ювентус"да қолса ҳам ўз даражасида ўйнашига ва клубига максимал фойда келтиришига шубҳа йўқ.
