Ярим йил аввал футболчилик фаолиятини якунлаганини эълон қилган Фабио Каннаваро ҳамда айни вақтда "Парма"да тўп сураётган Эрнан Креспо фаолиятини Ҳиндистон премьер-лигасида иштирок этаётган "Вест Бенгал" клубида давом эттиради. Бу ҳақда "Football Italia" интернет-нашри хабар бермоқда.
Италия терма жамоасининг собиқ сардори Твиттердаги саҳифасида: "Мен Ҳиндистон футбол уюшмасининг "Вест Бенгал" жамоаси сафида футболга қайтдим ;-)", деб ёзган.
Лигада, ушбу футболчилардан ташқари, Аргентина терма жамоасининг собиқ сардори Хуан Пабло Сорин, нигериялик Жей-Жей Окоча, франциялик Робер Пирес ва англиялик Робби Фаулер ҳам тўп суради.
"Football Italia"га кўра, яқин вақт ичида янги жамоага янги бош мураббий тайинланиши керак. Ушбу ўрин учун Питер Рид, Жон Барсн, Тони Адамс, Самсон Сиасиа, Колин Тодд, Тейтур Тодарссон ва Милош Руси каби мутахассислар даъвогарлик қилмоқда.