Хитойнинг "Шанхай Шенхуа" клуби футболчиси Николя Анелька "Челси"да ўтказган йиллари учун миннатдорчилик билдириб, янги жамоада янги саргузаштларни кутаётганини айтиб ўтди. Бу ҳақда "Goal.com" интернет-нашри хабар бермоқда.
Қишки трансфер ойнаси вақтида Хитой клубига ўтган франциялик футболчи "Стэмфорд Бридж"да ўтган йиллари давомида кўплаб иқтидорли футболчи ва мураббийлар билан бирга ишлашга муваффақ бўлганини алоҳида қайд этиб ўтди.
"Ҳар вақт мени қўллаб-қувватлаб турганингиз учун ҳар бирингизга миннатдорчилик билдиришни истайман. "Челси"да ўтказган дамларни ширин хотира билан эслайман. Бу машҳур жамоада мен нафақат иқтидорли футболчи ва мураббийлар билан бирга ишладим, шу билан бирга, жуда ҳам яхши дўстлар орттирдим. Мен Лондон ва унинг ажойиб ўзига хосликларидан ҳар доим завқ олганман", деди франциялик футболчи.
"Бироқ ҳамма яхши нарсалар ўз якунига етди ва 33 ёшга тўлганимда ниманидир ўзгартирадиган вақт келди. Мен янги ҳаёт, бошқа суръат, бошқа дунёдаги саргузаштлар сабаб бошқа жамоага ўтдим", деб ёзади Николя Анелька ўз твиттерида.