"Ювентус" бош мураббийи Антонио Конте скудетто учун курашда ўз шогирдларини "Милан"нинг асосий рақобатчиси деб ҳисобламаслигини айтиб ўтди. Бу ҳақда "Football Italia" интернет-нашри хабар бермоқда.

"Дастлаб биз жисмоний ҳолати аъло даражада бўлган жамоани мағлубиятга қандай қилиб учрата олишимизни ўйлашимиз керак. Мен ҳеч нимага кафолат бера олмайман, шунинг учун, келинг, "Кальяри"га қарши учрашувда уч очко ишлашга ҳаракат қилиб кўрамиз", деди Конте.

"Скудетто учун курашда ўзимизни "Милан"нинг асосий рақиби ва рақобатчиси деб билмаймиз. Амалдаги чемпион, шубҳасиз, соврин учун энг асосий даъвогар, унинг кетидан кетаётган бир неча клуб эса чемпионлик унвони учун ҳаракат қилиб кўради. Мавсумдаги асосий мақсадимиз энг яхши совринлар учун курашга қайтиш эканлигини ёддан чиқармаслигингизни сўрардим. Матбуот бизнинг "Милан"га қарама-қаршилигимизни ҳар турли йўл билан реклама қилмоқда, аммо бу ҳақда гапиришга ҳали эрта", деди "Ювентус" устози.

"Биз, шунингдек, рақибларнинг жамоамизга муносабати ўзгарганини ҳам тушуниб турибмиз. "Ювентус" барча учун синоат бўлишдан тўхтади, рақиб жамоалар энди бизга қарши энг яхши ўйинларини намойиш этишга ҳаракат қилишмоқда. Бу, албатта, жуда ёқимли факт, аммо бошқа томондан ўйинлар вақтида жиддий қийинчиликларга ҳам дуч келмоқдамиз", деди "Ювентус" бош мураббийи Антонио Конте.

Эслатиб ўтамиз, "Ювентус" 17 тур учрашувларидан сўнг Италия А Сериясида, "Милан" билан бир хил — 37 очко тўплагани ҳолда пешқадамлардан бири бўлиб турибди. Турин клуби Италия чемпионати 18-турида "Кальяри"ни қабул қилади. Учрашув 15 январь, якшанба куни, Тошкент вақти билан 19:00да бошланади.