«Ливерпул» ва Миср терма жамоаси ҳужумчиси Муҳаммад Салоҳ ўз терма жамоасига Африка Миллатлар Кубоги саралаш босқичининг 6-турида Коморга қарши ўйинда ғалаба қозонишда ёрдам берди (4:0). 28 ёшли ҳужумчи мазкур учрашувда дубл қайд этди.

Goal.com хабарига кўра ушбу учрашувдаги иккинчи гол Муҳаммад Салоҳнинг терма жамоадаги 43-голи бўлди. Ушбу кўрсаткич бўйича у Ҳасан Эл-Шазлидан (42) олдинда ўтиб иккинчи ўринни эгаллади. Миср жамоасининг энг яхши тўпурари ҳамон Ҳусам Ғасан бўлиб, унинг ҳисобида 68 та гол бор.

Маълумот учун, Салоҳ 2011 йилдан бери Миср терма жамоасига чақирилмоқда. Ҳужумчи 2017 йилдан буён «Ливерпул» шарафини ҳимоя қилиб келади ва бунгача у «Рома», «Фиорентина», «Челси» ва «Базел» сафида ўйнаган.

Олти турда 12 очко тўплаган Миср терма жамоаси Африка Миллатлар Кубоги саралашининг G гуруҳида биринчи ўринни эгаллаб турибди. Комор ороллари эса пешқадамдан уч очко орқада қолган ҳода иккинчи ўринни эгаллаб турибди. Мазкур квартетда шунингдек, Кения (7) ва Того (2) терма жамоалари ҳам бор.