Про лига пешқадамлари сафида бораётган «Динамо» жамоаси 5-тур доирасида Урганчда «Хоразм» жамоаси меҳмони бўлади.

Аввал хабар берганимиздек, ҳар ўйинда «Динамо»нинг «12-ўйинчиси» бўлишга интилаётган самарқандлик ашаддий ва жонкуяр мухлислар бориб-келиш масофаси қарийб 1400 километр масофани ташкил этишига қарамай, одатдагидек ўз ҳисобларидан сафарга – Хоразм томон йўлга отланмоқдалар.

Бугун, Самарқанд – Хива – Самарқанд йўналишида автобус соат 21:00да «Динамо» стадиони олдидаги фан клуб манзили олдидан жўнайди. Мухлислар етакчиси Шавкат Бурҳоновнинг хабар беришича, чипта нархи 200 минг сўм бўлган 50 кишилик автобусдаги барча жойлар мухлислар томонидан банд қилиб бўлинган ва жой қолмаган. Автобусда борадиган мухлисларга сюрприз тайёрлаб қўйилган. Мухлислар соат 20:00да тўпланиб, автобус соат 21:00да Хоразмга жўнаб кетади.

Шунингдек, яна ўнлаб мухлислар шанба куни Самарқанд – Урганч – Самарқанд авиарейси билан «Хоразм» - «Динамо» ўртасидаги учрашувни томоша қилиш учун самолётда жўнаб кетишади.

Маълумот учун, «Хоразм» - «Динамо» учрашуви 10 апрель, шанба куни соат 17:00да Урганчда бошланади.