"Ювентус" ҳужумчиси Пауло Дибала парижлик ҳужумчи Мауро Икарди эвазига "ПСЖ" га ўтиши мумкин. Италия клуби вакиллари аллақачон "ПСЖ" раҳбарияти билан боғланиб, мумкин бўлган келишув тафсилотларини муҳокама қилишган. "Ювентус" Икардининг рафиқаси ва агенти Ванда Нара билан учрашишни режалаштирмоқда, деб ёзади Football Italia нашри.
Дибаланинг "Наполи"га урган голи (2:1) футболчи ва клуб ўртасидаги қийин вазиятни ижобий томонга ўзгартира олмади. Маълум қилинишича, раҳбарият бир неча ойдан бери шартномани узайтириш тўғрисида футболчига мурожаат қилмаяпти.
Шу билан бирга, Tuttosport хабарига кўра, Дибаладан кетиш ҳақидаги қарор ҳали якуний эмас. Клуб май ойида футболчининг агенти билан учрашиб, янги шартнома борасида музокара олиб боришга ҳаракат қилади. Ушбу музокараларда жамоанинг Чемпионлар Лигаси йўлланмасига эга чиқиш, ёки чиқмаслигига қаралади.
Дибаланинг "Ювентус" билан амалдаги шартномаси 2022 йилнинг ёзида якунига этади. Футболчининг текинга кетишининг олдини олиш учун клуб аргентиналик билан янги шартнома имзолаши ёки ёзда сотиши керак.
27 ёшли ҳужумчи А Сериянинг 12 ўйинида 3 та гол урган ва 2 та голли узатмани амалга оширган.Икарди Лига 1-нинг 15 ўйинида 5 та гол ва 3 та голли узатмани амалга оширган.
