"Yuventus" hujumchisi Paulo Dibala parijlik hujumchi Mauro Ikardi evaziga "PSJ" ga o‘tishi mumkin. Italiya klubi vakillari allaqachon "PSJ" rahbariyati bilan bog‘lanib, mumkin bo‘lgan kelishuv tafsilotlarini muhokama qilishgan. "Yuventus" Ikardining rafiqasi va agenti Vanda Nara bilan uchrashishni rejalashtirmoqda, deb yozadi Football Italia nashri.

Dibalaning "Napoli"ga urgan goli (2:1) futbolchi va klub o‘rtasidagi qiyin vaziyatni ijobiy tomonga o‘zgartira olmadi. Ma’lum qilinishicha, rahbariyat bir necha oydan beri shartnomani uzaytirish to‘g‘risida futbolchiga murojaat qilmayapti.

Shu bilan birga, Tuttosport xabariga ko‘ra, Dibaladan ketish haqidagi qaror hali yakuniy emas. Klub may oyida futbolchining agenti bilan uchrashib, yangi shartnoma borasida muzokara olib borishga harakat qiladi. Ushbu muzokaralarda jamoaning Chempionlar Ligasi yo‘llanmasiga ega chiqish, yoki chiqmasligiga qaraladi.
Dibalaning "Yuventus" bilan amaldagi shartnomasi 2022 yilning yozida yakuniga etadi. Futbolchining tekinga ketishining oldini olish uchun klub argentinalik bilan yangi shartnoma imzolashi yoki yozda sotishi kerak.

27 yoshli hujumchi A Seriyaning 12 o‘yinida 3 ta gol urgan va 2 ta golli uzatmani amalga oshirgan.Ikardi Liga 1-ning 15 o‘yinida 5 ta gol va 3 ta golli uzatmani amalga oshirgan.