Бугундан бошлаб, сайтда пайдо бўлган кичик ўзгаришни пайқаган бўлсангиз керак. Олдинроқ ваъда берилганидек, сайтимизда мақолалар, хабарлар ва мухлис изоҳларини баҳолаш – рейтинг тизими ишга туширилди. Ушбу жараёнда нафақат админлар, балки фойдаланувчилар ҳам тенг қатнашадилар. Ҳам иштирокчи, ҳам ҳакам сифатида. Бу қандай бўлади?
Хабарлар лентасида ва блогларда киритилган ҳар бир материал ва унга билдирилган изоҳларнинг бурчагида уни баҳолаш имконияти мавжуд. Сизга ўша хабар ёки мақола ёқса, тепага қаратилган “ўқ”ни босасиз. Хабар ёки изоҳнинг рейтинг баҳоси +1 га кўпаяди. Аксинча, агар пастга қаратилган “ўқ”ни боссангиз, бу сизга ёқмаганлигини билдиради. Шу йўсинда хабар ёки изоҳнинг рейтинг баҳоси -1 га камаяди.
Овоз бериш жараёнида ҳар бир хабар ёки изоҳни фақат бир марта баҳолаш имконига эгасиз. Ўз изоҳингизга овоз бера олмайсиз.
Бир фойдаланувчининг бир нечта изоҳининг ҳар бирини алоҳида баҳолашингиз мумкин.
Бир фойдаланувчи бир суткада 25 маротаба овоз бериш ҳуқуқига эга. Яъни ихтиёрингизда ҳаммаси бўлиб, 25 маротаба “ўқ”ни босиш имконингиз бўлади. Бу “плюс” ёки “минус” бўлиши ҳам ўзингизга боғлиқ. Хабарлар, мақолалар, блоглардаги материаллар, изоҳлар – буларнинг ҳар бирини баҳолашингиз мумкин. Фақат бир кунда 25 маротаба.
Ҳар бир фойдаланувчи изоҳида “+” ва ”–“ ёрдамида тўпланган умумий баллар ўша изоҳни қолдирган фойдаланувчининг профилида тўпланиб борилади. Яъни “плюс”лар умумий баллга йиғилиб, “минус”лар автоматик тарзда айрилиб борилади.
Фойдаланувчи тўплаган умумий бал 1000 тага етганда унинг профилига битта юлдузча қўшилади.
Юлдузчаси бештага етган фойдаланувчи “вип фойдаланувчи”га айланади ва унга нисбатан ўзига хос имтиёзлар, қулайликлар яратилиши ва рағбатлантирилиши мумкин. Бу ҳақида ҳали ўйлаб кўрамиз ва сизга хабар берамиз.
Бу тизимнинг яратилишидан мақсад – қандайдир мусобақа ёки сунъий фикрларни кўпайтириш эмас. Фойдаланувчининг ўз никига, ёзган фикрларига бўлган хурматини оширишдир. Яъни ҳар қандай фойдаланувчи ойлар, ҳатто йиллар давомида тўплаган балларини қадрига етади, осонгина ундан воз кечиб, янги ник очишга, ҳаммасини йўқдан бошламасликка ҳаракат қилади.
Бундан ташқари, сайтга қўйилаётган хабар ва мақолаларнинг сиз томонингиздан қай шаклда эътироф этилаётганини билиш учун бизга имкон беради ва ўзига хос мониторинг вазифасини ўтайди. Зеро, фақат сиз истаган, сизга қизиқ бўлган хабар ва материалларни беришга ҳаракат қилишимиз учун асос бўлади.
Сиздан илтимос, бу жараёнга нисбатан холис муносабатда бўлинг ва сунъийликка йўл қўйманг.
Биринчидан, суньийлик билан ҳеч нарсага эришиб бўлмайди.
Иккинчидан, сунъий қўйилган баллар барибир ўша изоҳда кўриниб туради, пайқаш қийин эмас.
Учинчидан, буни пайқаб қолсак, ўша изоҳни ўчириб ташлаймиз ва қўшилган баллар ўз ўзидан йўқолиб кетади.
Футболни севинг. “Стадион”да қолинг. Эътибор учун рахмат.
