Ўзбекистон кубоги 2-туридан ўрин олган "Насаф" - "Рубин" (4:0) учрашувидан сўнг бўлиб ўтган матбуот анжуманида қаршиликлар устози Рўзиқул Бердиев журналистлар саволларига жавоб берди.

"Бугун 3 очкони қўлга киритишни мақсад қилгандик ва унга эришдик. Йигитларга "Бунёдкор" - "Рубин" ўйини натижасига (10:0) эътибор қилмасликларини тайинлагандим, асосийси ғалаба эди. Бугун кам майдонга тушаётган футболчиларга имконият бердик. Ўйин устунлигимиз остида ўтди, натижа ҳам буни кўрсатиб турибди. Баъзи футболчиларимизда техник-тактик хатолар бўлиб турди. Рақибларнинг даражаси бугун кўриниб қолди.

Ўтган турдаги Жиззахдаги бир очко бизни қониқтирди. Сабаби "Сўғдиёна" медаллар учун курашмоқда, турнир жадвалида ҳам биздан юқорида турибди. Қолаверса, улар ўз майдонида ўйнади ва тажрибали футболчиларга эга.

28 апрель куни "Бунёдкор" билан ўйнаймиз, шу боис бугун кўпроқ ёшларга имконият бердик. Тан олиш керак, бизда битта таркиб бор.

Кубок баҳсларида ҳам ВAР тизими ишласа яхши бўларди. Баҳсли вазиятларда ВAР ёрдам беради.

ОФК кубоги ҳақида? Олдиндан ҳеч қандай ваъда бера олмаймиз. Ҳозирга қадар Тожикистон ва Қирғизистон клублари иштирокидаги ўйинларни кузатиб ўргандик. Ўйлайманки, ОФК кубогида максимум ҳаракат қилиб яхши натижага уринамиз", - дейди Рўзиқул Бердиев.