Dubai Matchworld Cup-2012 турнири "А" гуруҳида кеча 2-тур беллашувларига якун ясалди. Дастлаб Тошкентнинг "Бунёдкор" клуби Швейцариянинг "Ксомакс" клубини 1:0 ҳисобида мағлуб этган бўлса, кейин Санк-Петербургнинг "Зенит" клуби Ироқ олимпия терма жамоасидан 2:1 ҳисобида устун келди.
Натижада питерликлар 2та ўйинда юз фоизлик натижа қайд этиб, гуруҳ ғолиблигини қўлга киритишди. Қизиқ томони, "Бунёдкор" ва Ироқ олимпия терма жамоалари бир ҳил кўрсаткич қайд этишди. Бироқ ироқликлар Ўзбекистон олимпиячилари сингари турнирда конкурсдан ташқари иштирок этишмоқда. Бу ҳолат инобатга олиниб, "Бунёдкор" "А" гурҳини 2-ўринда якунлади дейиш тўғрироқ бўлса керак.
Ироққа қарши ўйинда "Зенит" 10-дақиқада Александр Бухаровнинг голидан кейин олдинга чиқиб олганди. 60-дақиқада эса Муҳаммад Лучанно Спалетти шогирдлари дарвозасини ишғол қилиб, мувозанатни тиклади. Иккинчи бўлимда заҳирадан майдонга тушган Александр Кержаковнинг 76-дақиқада киритган голи эса ўйинга мантиқий якун ясади - 2:1.
