«Ювентус» ҳужумчиси Пауло Дибаланинг келажакдаги фаолияти ҳали ҳамон сўроқ остида.

Энди футболчининг келажаги тўғридан-тўғри, клубнинг мавсум охирида Чемпионлар Лигаси йўлланмасига эга чиқишига боғлиқ, деб хабар беради Football Italia.

Ҳозирча туринликлар аргентиналик билан шартномани узайтириш бўйича келишувга эриша олишмади.

Шу сабабли, 2022 йил ёзида, амалдаги шартномаси тугагач, футболчини текинга қўйиб юбормаслик учун, «Ювентус» ушбу ёзда Паулони сотиши мумкин.

Агар, «кекса синьора» Чемпионлар Лигасига чиқа олмаса, у ҳолда Дибала трансферга қўйилади. Шу билан бирга, 27 ёшли ҳужумчининг ўзи жамоада қолишни истаётгани таъкидланган.

Жорий мавсумда футболчи А Серияда 16 учрашув ўтказган ҳолда 3 гол ва 2 ассистга муаллифлик қилди.