Экваториал Гвинея ва Габонда бошланган Африка миллатлар кубогининг «А» гуруҳи 1-туридан ўрин олган иккинчи учрашувда Бата шаҳрида Замбия ва Сенегал терма жамоалари ўзаро учрашишди.

Замбия терма жамоаси 12-дақиқада Эммануэль Маюка ва 20-дақиқада Рейнфорд Калабаларнинг тезкор голлари эвазига 2:0 олдинга чиқиб олишди. Сенегаллик чарм тўп усталари фақат 74-дақиқага келиб жавоб тўпини киритишди. Гуиран Н’Даунинг Тўп узатишидан Даме Н’Доэ дарвозани аниқ нишонга олди.

Бугун «В» гуруҳида 1-тур учрашувларига старт берилади. Экваториал Гвинеянинг Малабо шаҳридаги «Нуэво Эстадио де Малабо» стадионида Тошкент вақти билан 21:00 да Кот-д’Ивуар – Судан, 00:00 да Буркина Фасо – Ангола учрашувлари ўтказилади.