Ҳаётнинг ишлари қизиқ-да... Мишель Ворм бир йилча олдин ҳам «Тоттенхэм» дарвозабони эди, энди у - ўз мамлакати Нидерландия қишлоқларидан биридаги сартарошхона соҳиби. Футболчилик фаолияти чакки чиқмаган голкипер 2020 йилнинг октябрь ойи охирида қўлқопларини михга илишини эълон қилди. Аслида у 2019 йил ёздаёқ хайрлашувга яқин эди - «Тоттенхэм» билан шартномаси муддати тугагач, ўзига муносиб янги клуб тополмаганди.
Қарангки, мавсум-2019|2020 стартидан кўп ўтмай, аниқроғи, кузда «Тоттенхэм»нинг асосий дарвозабони Уго Льорис жиддий жароҳатга йўлиқиб, маълум муддатга сафдан чиқди ва Вормнинг фаолияти яна бир йилга чўзилди. Тўғри, нидерландиялик кипер 6 йил «шпорлар» ихтиёрида бўлиб, бу оралиқда АПЛ доирасидаги атиги 13та ўйинда қатнашди. Айтиш ўринли, Михелнинг ўзи ўтган ёз ҳам футболдан кетиш ҳақида жиддий ўйламаганди: «Энди Нидерландиядан ташқарига чиқмаслик борасида аниқ тўхтамга келгандим. Фақат Эредизионда ўйнашим мумкин эди. Жуда иложи топилмаса, Бельгия чемпионатига йўл олардим... Аммо таклифлар тушгани йўқ, кейин футболчилар бўм-бўш трибуналар остида қандай ўйнаётганларини кузатдим ва шу аснода кетиш учун энг қулай вақт келганини англадим. Фаолиятим давомида ички имкониятимни қай даражада ишга солганим ва иқтидоримдан нечоғли фойдаланганимни билмайман. Ҳар доим аввалига «А» вариантини танлаган ва кейинчалик аслида «Б» яхшироқ бўлганини ўйлаганман. Лекин яна бир томони борки, «Тоттенхэм»да менга нисбатан жуда яхши муносабатда бўлишди. Шундай ёндашув таъсирида ҳаттоки, атиги иккинчи дарвозабон эканлигим ҳақида кўпам бош қотирганим йўқ».
Ворм энди қадрдон уйида яшамоқда. Унинг хонадони Утрехт шаҳри теварагидаги сўлим гўшада. Бу қишлоқчада атиги 6 мингга яқин аҳолиси бор. Собиқ кипер ҳозир у ерда асли отасига қарашли шахсий сартарошхона ишларини юргизмоқда. Эътиборли томони, эндиликда ушбу кичик салон мижозлари маникюр ва турли хизматлардан фойдаланиш баробарида мириқиб футбол томоша қилиш имкониятига эгалар. «Йўқ, бировнинг сочини ўзим олмайман. Мижозларга бевосита хизмат ҳам кўрсатолмайман. Аммо болалигимда айнан шу сартарошхонада отамга ёрдам берардим. Тўғри, ўшанда асосан хонани тозалаб чиқардим. Қаранг, айланиб-айланиб, яна шу ерга келиб қолдим. Ҳаётим чархпалаги бир бора айланди...», - дейди Мишель Ворм.
А. АҲМЕДОВ тайёрлади
