Dubai Matchworld Cup якунланиб бормоқда. Бугун, 23 январь куни якуний турнир жадвали шакллантирилади. Барча жамоалар аллақачон кейинги лойиҳалари устида бош қотиришга киришиб кетишган. Боз устига, 2012 йилги муcобақанинг мантиқий нуқтаси, деб ҳисобланиши мумкин бўлган анъанавий маросим ҳам ўтказиб бўлинди.
Мана, икки йилдирки, анъана тусига кирган маросимда қатнашувчи жамоаларнинг сардорлари Дубайдаги энг машҳур бино – дунёдаги энг баланд осмонўпар иншоот – «Бурж Халифа» яқинида суратга тушишади.
Бу йилги суратга тушиш маросимида Саккиз жамоа етакчилари қатори Ўзбекистон олимпия терма жамоаси сардори Фозил Мусаев ва «Бунёдкор» сардори Виктор Карпенколар ҳам иштирок этишди. Жамоалар етакчилари бир-бирлари билан, шунингдек турнир ташкилий қўмитаси вакиллари билан мулоқот қилишди. Фотосурат эса тарихий бўлиб чиқди, айнан мана шу сурат йиллар ўтгач «Dubai Matchworld Cup-2012»ни ёдга солиб туради.
