Премьер-лига Англия клубларининг УЕФА мусобақасидаги ютуқлари эвазига УЕФА коэффициентлар жадвалида биринчи ўринга чиқиб олди.

9 йил ичида биринчи марта Англия Премьер-лигаси Ла Лигани ортда қолдириб, жадвалнинг биринчи қаторига кўтарилади.

Бунга қадар, Премьер-лига 2007/08 йилги мавсумдан 2011/12 йилги мавсумгача биринчи ўринда бораётган эди. Англия клублари УЕФАнинг Европа мусобақаларидаги сўнгги беш мавсумдан учтасида испанлардан устун келди ва коэффициентлар жадвалида дастлаб, Ла Лига билан фарқни қисқартирди сўнгра эса, биринчи ўринга чиқиб олди.

Бундан ташқари, Премьер-лига Англиянинг учта клуби Чемпионлар Лигаси ва Европа Лигаси финалига йўл олганидан сўнг, Ла Лиганинг коэффициентлар жадвалида энг кўп очко тўплаш бўйича рекордини янгилади.

2015/16 йилги мавсумда «Реал» Чемпионлар Лигасида, «Севилья» эса Европа Лигасида ғолиб чиқди. Шундан сўнг, Испания клублари рейтингда 23,928 очко тўплашди. Англия клублари эса жорий мавсумда худди шундай кўрсаткичга эга бўлиб туришибди. Чемпионлар Лигаси ва Европа Лигаси финал ўйинлари ўтказилгандан сўнг, Премьер-лига клублари табиийки янги рекорд ўрнатадилар.