Ўзбекистон миллий жамоаси ҳамда БААнинг «Шаржа» клуби яримҳимоячиси Отабек Шукуров клубини ўзгартиради.

24 ёшли футболчи «инстаграм»даги саҳифасида 4 йил давомида фаолият олиб борган клубини тарк этаётганини маълум қилган.

«Бу ердаги илк кунларимданоқ бу мамлакат ва шаҳарни ҳамда «Шаржа» мухлисларини яхши кўриб қолганман. Шаржа – бир умрга юрагимдан жой олган. Ўзимни ҳар доим шаржалик деб ҳис қиламан. Барча-барчаси учун раҳмат!», – дея клуби билан хайрлашган Отабек Шукуров.

Маълумот учун, «Шаржа» клуби якунига етаётган БАА Про лигаси жорий мавсумида 25-турдан кейин 48 очко билан 3-ўриндан жой олган. Шаржаликлар мавсумнинг сўнгги ўйинини 11 май куни сафарда «Ал-Иттиҳод Калба»га қарши ўтказишади.

Эслатиб ўтамиз, Отабек Шукуров 2017 йил якунида «Бунёдкор»дан эркин агент сифатида БААнинг «Шаржа» клуби сафига келиб қўшилганди. Қарийб 4 йиллик фаолияти давомида 24 ёшли яримҳимоячи шаржаликлар билан 2019 йилги мавсумда БАА чемпиони ва Суперкубоги соҳибига айланганди. Жорий мавсумда эса жамоа бронза медалига эга чиқишга яқин.