O‘zbekiston milliy jamoasi hamda BAAning «Sharja» klubi yarimhimoyachisi Otabek Shukurov klubini o‘zgartiradi.

24 yoshli futbolchi «instagram»dagi sahifasida 4 yil davomida faoliyat olib borgan klubini tark etayotganini ma’lum qilgan.

«Bu yerdagi ilk kunlarimdanoq bu mamlakat va shaharni hamda «Sharja» muxlislarini yaxshi ko‘rib qolganman. Sharja – bir umrga yuragimdan joy olgan. O‘zimni har doim sharjalik deb his qilaman. Barcha-barchasi uchun rahmat!», – deya klubi bilan xayrlashgan Otabek Shukurov.

Ma’lumot uchun, «Sharja» klubi yakuniga yetayotgan BAA Pro ligasi joriy mavsumida 25-turdan keyin 48 ochko bilan 3-o‘rindan joy olgan. Sharjaliklar mavsumning so‘nggi o‘yinini 11 may kuni safarda «Al-Ittihod Kalba»ga qarshi o‘tkazishadi.

Eslatib o‘tamiz, Otabek Shukurov 2017 yil yakunida «Bunyodkor»dan erkin agent sifatida BAAning «Sharja» klubi safiga kelib qo‘shilgandi. Qariyb 4 yillik faoliyati davomida 24 yoshli yarimhimoyachi sharjaliklar bilan 2019 yilgi mavsumda BAA chempioni va Superkubogi sohibiga aylangandi. Joriy mavsumda esa jamoa bronza medaliga ega chiqishga yaqin.