Германиянинг "Трансфермаркт" веб-сайти таҳлилчилари Ўзбекистон миллий терма жамоаси ва Қозоғистоннинг "Актобе" клуби ҳужумчиси Игорь Сергеевнинг АПЛ клуби бўлмиш "Шеффилд Юнайтед"га ўтиш эҳтимолини 3 фоизга баҳолади.
Айни пайтда, Сергеевнинг Англия чемпионатига ўтиши ҳақидаги миш-мишлар сайтдаги асосий трансфер мавзуси бўлиб, Ўзбекистон миллий терма жамоаси ҳужумчисининг сурати Премьер-лига клублари рўйхатининг рус тилидаги версиясида биринчи саҳифада жойлашган.
Веб-сайт аниқлик киритишича, ижтимоий тармоқларда содир бўлиши кутилаётган трансфер ҳақидаги маълумотлар ўзбекистонлик журналист Даврон Файзиев томонидан нашр этилган. У Қозоғистондаги манбаларига асосланиб, инглизларнинг ўзбек голеадорига қизиқиши ҳақида хабар берган.
Игорь Сергеев Тошкентнинг "Пахтакор" клуби тарбияланувчиси ҳисобланади. 2011 йилдан бошлаб у асосий жамоада ўйнашни бошлаган. 2016 йилда у ярим мавсумни хитойнинг "Бейжинг Гоан" клубида ўтказди. У "Пахтакор" га қайтди, аммо 2017 йилда уни БААнинг "Аль-Дафра" клуби сотиб олди. 2018 йил июль ойида Сергеев яна "Пахтакор"га қайтди. 2021 йилда у Қозоғистоннинг "Актобе" жамоасига эркин агент сифатида келиб қўшилди.
У "Пахтакор" тарихидаги миллий чемпионатларнинг энг яхши тўпурари саналади. Игор Сергеев Ўзбекистон миллий терма жамоаси сафида 54та ўйин ўтказиб, 17та гол урган. "Трансфермаркт" хабарига кўра, ҳужумчининг қиймати 1,5 миллион эврога баҳоланмоқда. Шунингдек, футболчи ҚПЛда 2021 йилнинг энг қиммат ўйинчилари ўнлигидан жой олди.
