11 январь куни Лондондаги «Селҳёрст Парк» стадионида бўлиб ўтган биринчи учрашувда Энтони Гарднернинг 43-дақиқада киритган ягона голи эвазига «Кристал Пэлас» ғалаба қозонган эди.
Буни қарангки, Уэльсдаги «Кардифф Сити стэдиум»да ҳам айнан шу футболчи гол киритди – фақат ўз дарвозасига. Гарднер томонидан учрашувнинг 7-дақиқасида киритилган автогол асосий бўлим якунланганга қадар ягоналигича қолди. Қўшиб берилган чорак соатлик икки бўлимчалар ҳам ўтиб бўлдики, дарвозаларга бошқа гол киритилмади.
Пенальтилар сериясида эса уэльсликларнинг қўли баланд келди ва улар тарихда илк бор Англия Лига кубоги финалига йўл олишди. (Таъкидлаш жойизки, «Кардифф Сити» уч бор Англия кубоги финалига чиққан ва 1927 йилда совринни қўлга ҳам киритган).
АНГЛИЯ ЛИГА КУБОГИ. ЯРИМ ФИНАЛ
КАРДИФФ СИТИ — КРИСТАЛ ПЭЛАС 1:0 (1:0, 0:0, 0:0)
Пенальтилар бўйича — 3:1
Гол: Энтони Гарднер (7-автогол)
Дастлабки учрашув — 0:1
Англия Лига кубогининг иккинчи ярим финали жавоб учрашуви эртага, Тошкент вақти билан чоршанбадан пайшанбага ўтар кечаси 00:45 да бошланади. Ливерпулдаги «Энфилд» стадионида «Ливерпуль» – «Манчестер Сити» учрашуви бўлиб ўтади.
