Футбол учрашувларининг яхши савияда ташкил этиши ва жамоалар учрашув давомида ўзларининг энг яхши ўйинини намойиш қилиши учун биринчи навбатда майдоннинг ҳолати қониқарли бўлиши лозим.
ЎзПФЛ байроғи остида ўтказилувчи мусобақалар учрашувларини қабул қиладиган стадионларда фаолият олиб бораётган мутахассисларни майдон парвариши бўйича жаҳон тажрибаси билан таништириш мақсадида “Engo” халқаро холдинги билан ҳамкорликда “Turf Education 2021 Uzbekistan” ўқув семинари ташкил этилди.
15-16 май кунлари бўлиб ўтадиган семинарда Coca-Cola Суперлига, Про лига ҳамда Биринчи лига клублари ходимлари, стадионлар маъмурияти вакиллари, майдон усталари, сунъий ва табиий қопламали майдонлар ва спорт иншоотлари барпо этиш бўйича мутахассислар иштирок этишмоқда.
Қайд этиш жоиз, “Engo” халқаро холдинги спорт майдонлари қурилиши ва майдон парвариши бўйича улкан тажрибага эга ташкилот саналади. Семинарда Словакия, Россия ҳамда украиналик тажрибали мутахассислар футбол майдонларини яхши сақлаш, майдон парвариши, бу борада қўлланиладиган сўнгги замонавий технологиялар бўйича тақдимотлар ўтказишади. Унда футбол майдонлари мутахассислари ўз соҳасидаги сўнгги янгиликардан бохабар бўлиш ва бу борадаги билимларини бойитиш имконига эга бўлишади.