Халқаро футбол тарихи ва статистикаси федерацияси (IFFHS) сўнгги 25 йилликнинг энг яхши ҳакамлари рейтинг жадвалини эълон қилди. Унда 1987-2011 йиллар оралиғи ҳисобга олинган. Ҳар йили ўтказиладиган ҳакамлар сўровномаси умумлаштирилган ҳолда, мазкур рейтинг жадвали ҳосил қилинди. Яъни, ҳар йили ўтказиладиган танловда натижасида кучли 20 нафар ҳакам танлаб олинади ва 1-ўриндаги ҳакамга 20, иккинчи ҳакамга 19 ва ҳоказо... 20-ўриндаги ҳакамга 1 балл берилади. Йиллик ҳакамлар рейтингида ҳакамлар сони 20 нафардан ошса, 21-ўриндан пастки ҳакамларга балл берилмайди.

Демак, италиялик ҳакам Пьерлиуджи Коллина сўнгги 25 йилликнинг энг яхши ҳаками деб топилди. У 191 очко тўплашга муваффақ бўлди. Германиялик Маркус Мерк эса 184 очко билан иккинчи бўлди. Учинчи ўрин даниялик Ким Милтон Нилсенга насиб этди.

Ўзбекистонлик Равшан Эрматов эса IFFHS рейтингига атиги 3 йилдан бериб кириб келаётган бўлсада, 48 очко билан 38-ўринни эгаллади. Ушбу ташкилот томонидан 2011 йилнинг энг яхши ҳаками деб топилган Виктор Кашшай эса 43-ўринда қайд этилди. Венгриялик рефери ҳамюртимиз 3 очко камроқ очко жамғарди.

Рейтинг жадвалида 151 нафар ҳакамнинг номи келтирилган. Рейтингнинг тўлиқ кўриниши билан IFFHS сайтида танишиб олишингиз мумкин.