"Зенит" клуби ҳужумчиси Данко Лазович "Советский спорт" нашрига берган интервьюсида Ўзбекистон терма жамоаси томонидан амалга оширилган антиқа пенальти ҳақида ўз фикрларини билдирди. Дарвоқе, Лазовичнинг ўзи Санжар Қувватов дарвозасини пенальтидан ишғол қилди.
— "Зенит" Match World Cup мусобақасида ғолибликни қўлга киритди. Сиз эса пенальтини оддий тарзда — марказ бўйича тепиб, гол урдингиз. Худди Ўзбекистон терма жамоаси футболчилари каби 11 метрли жарима тўпини сал бошқачароқ — тўпни олдинга юмалатиб қўйиб, бошқа футболчи уни голга айлантириш ҳақида ўйлаб кўрмаганмисиз?
— Нима десам экан... — бир сонияга ўйланиб қолади Лазович. — Ҳаттоки ўртоқлик учрашувларида ҳам футболчи ўзини профессионал тарзда тутиши керак. Айниқса, "Зенит" каби жамоанинг шарафини ҳимоя қилаётган бўлсанг. Жиддий бўлиш керак. Ҳар доим. Мен қандайдир ғалати нарсаларни ўйлашдан кўра, оддий зарбалар орқали гол уришни афзал кўраман.
Лекин, аввал шунга ўхшаш нарса бўлганди. Сербия ўсмирлар терма жамоасида ўйнаётганимда Уэльс дарвозасини шундай комбинациядан кейин ишғол қила олмагандим. Ўшандан кейин бошқа таваккал қилмайман. Бу муҳим ўйин эди, мен эса жиннилик қилганман. Ўшанда ютқазиб қўйишимизга сал қолганди.
