Шу йилнинг 23 июнь - 8 июль кунлари 21 ёшгача бўлган ёшлар ўртасида Осиё чемпиоантининг саралаш ўйинлари бўлиб ўтади. ОФК эса саралаш ўйинларига қуръа ташлаш маросимини 14 февраль куни соат 11:00да (Малайзия вақти билан) ўтказишга қарор қилди. Маросим ОФКнинг қароргоҳида бўлиб ўтади.

Ушбу мусобақада 39та терма жамоа иштирок этиш истагини билдирди. Жамоалар ўтказилган сўнгги U19 Осиё чемпионати натижаларига кўра рейтингга ажратиб чиқилади. Дастлабки U22 Осиё чемпионати 2013 йилда ўтказлади. 2015 йилда ўтказиладиган қитъа чемпионати эса 2016 йили Рио де Жанейрода ўтадиган олимпия ўйинлари учун саралаш вазифасини ўтаб беради.

Дарвоқе, ушбу ёшдаги Осиё чемпионати мезбони олдиндан белгиланиши ва саралаш ўйинларидан озод этилиши кўзда тутилганди (мақсад — мезбон Осиё чемпионатини ўтказиш учун олдиндан тайёргарлик кўриб боради). Лекин ҳозирча мезбон давлат номи аниқланмади.

Демак, мусобақада иштирок этиш хоҳишини билдирган терма жамоалар рўйхати (алифбо тартибида):
Баҳрайн, Бангладеш, БАА, Вьетнам, Гонконг, Жанубий Корея, Индонезия, Ироқ, Иордания, Кувайт, КХДР, Лаос, Ливан, Макао, Малайзия, Мальдив ороллари, Мьянмар, Непал, Покистон, Фаластин, Филиппин, Саудия Арабистони, Сингапур, Сурия, Тожикистон, Таиланд, Туркманистан, Уммон, Хитой, Хитой Тайпейи,  Шарқий Тимор, Шри-Ланка, Эрон, Яман, Япония, Ўзбекистон, Қатар, Қирғизистон, Ҳиндистон.