«Монако» устози Нико Ковач Франция кубоги финалида жамоасининг мағлубияти ҳақида фикр билдирди. 

«Аввало, мен ПСЖни муносиб ғалаба билан табриклайман. Ўйин бошида биз учун бироз хавфсираш бор эди, чунки бу биз учун ушбу таркиб билан қатнашаётган биринчи финал.

ПСЖ эса бундай учрашувларда катта тажрибага эга. Эҳтимол, учрашув бошида биз рақибимизга ҳаддан ташқари катта ҳурмат билан қараб юборгандирмиз.

Умуман олганда, мен футболчиларимга улар билан фахрланишимни айтдим. Биз бутун мавсум давомида яхши ишладик ва Франция кубоги финалига чиқиш биз учун катта ютуқ.

Учрашувдаги Мбаппенинг ҳаракатларини алоҳида таъкидлаш лозим. Мен уни дунёнинг энг яхши футболчиси деб биламан. У қарама-қаршилик натижасини деярли бир ўзи ҳал қилди.

Унинг ўйинига қараб, нега кўплаб клублар уни сотиб олишни хоҳлаётганини тушунасиз», - дея Ковачнинг сўзларини келтиради клуб матбуот хизмати.