Испания футбол лигасининг ҳакамлар техник қўмитаси Испания кубоги чорак финали жавоб учрашуви доирасида ўтган «Барселона» – «Реал» (2:2) учрашувининг бош ҳаками Фернандо Тейшейра Витьенс ишини таҳлил қилиб чиққан.

Ҳакамнинг энг қўпол хатоси сифатида мадридликларнинг ярим ҳимоячиси Лассана Диаррани майдондан четлатмагани қайд этилган, – деб хабар беради AS

Матч қатнашчилари томонидан баҳсли деб даъво қилинган бошқа эпизодлар бўйича қўмита ҳакамнинг қарорларини қўллаб-қувватлаган: «Реал» ҳимоячиси Серхио Рамоснинг четлатилиши ўринли деб топилди, бундан ташқари, комиссия фикрича «Барселона» жарима майдони ичида қўл билан ўйналган эпизодда ҳакам тўпнинг қўлга текканини илғаши қийин бўлгани таъкидланди.

«Реал» ҳужумчиси Карим Бензема ва каталонияликлар форварди Алексис Санчесга қарши қоида бузилган ҳолатларда ҳам ҳакам қарорларига нисбатан шундай тушунтириш берилди.

Эслатиб ўтамиз, «Реал» Серхио Рамоснинг четлатилишига нисбатан норозилик шикояти ёзган эди.