Испания миллий жамоаси бош мураббийи Луис Энрике Серхио Рамоснинг Евро-2020га йўл оладиган таркибга киритмаганини изоҳлади.
«Евро-2020 учун 26 нафар ўйинчини жалб этиш мумкин эди, аммо якунда фақат бир нафар ҳужумчини қўшиб, 24 футболчини чақириш қарорига келдик. Ҳар бир ўйинчида миллий жамоага ёрдам бера олиш иштиёқи бўлиши учун ҳам 24 нафардан кўпроқ ўйинчи олишни истамаймиз.
Рамос? Серхио январь ойидан буён етарлича ўйин амалиётига эга бўлмагани сабабли таркибда эмас. Бу мен учун ҳам жуда қийин қарор бўлди. Бу ҳақда кеча унинг ўзига ҳам айтдим, осон бўлмади.
Бу ёқимсиз ҳолат, чунки Рамос ҳар доим юқори даражали ўйинчи бўлган. Аммо бу қарор жамоа манфаати учун ишлашини тушуниб турибман», - дейди испаниялик мутахассис.
Маълумот учун, Рамос Испания сафида ўйинлар сони бўйича рекордчи саналади. Серхио «қизил фурия» таркибида энг кўп – 180та ўйинда майдонга тушган.
