Ispaniya milliy jamoasi bosh murabbiyi Luis Enrike Serxio Ramosning Yevro-2020ga yo‘l oladigan tarkibga kiritmaganini izohladi.

«Evro-2020 uchun 26 nafar o‘yinchini jalb etish mumkin edi, ammo yakunda faqat bir nafar hujumchini qo‘shib, 24 futbolchini chaqirish qaroriga keldik. Har bir o‘yinchida milliy jamoaga yordam bera olish ishtiyoqi bo‘lishi uchun ham 24 nafardan ko‘proq o‘yinchi olishni istamaymiz.

Ramos? Serxio yanvar oyidan buyon yetarlicha o‘yin amaliyotiga ega bo‘lmagani sababli tarkibda emas. Bu men uchun ham juda qiyin qaror bo‘ldi. Bu haqda kecha uning o‘ziga ham aytdim, oson bo‘lmadi.

Bu yoqimsiz holat, chunki Ramos har doim yuqori darajali o‘yinchi bo‘lgan. Ammo bu qaror jamoa manfaati uchun ishlashini tushunib turibman», - deydi ispaniyalik mutaxassis.

Ma’lumot uchun, Ramos Ispaniya safida o‘yinlar soni bo‘yicha rekordchi sanaladi. Serxio «qizil furiya» tarkibida eng ko‘p – 180ta o‘yinda maydonga tushgan.