Кеча Саудия Арабистони Валиаҳд шаҳзода кубоги ярим финалининг биринчисида Риёзнинг «Ал-Ҳилол» клуби Жидданинг «Ал-Иттиҳод» жамоаси дарвозасига жавобсиз 2 та тўп йўллаб, финалга йўл олгани ҳақида маълумот бериб ўтган эдик.

Бугун ярим финалнинг иккинчи учрашуви бўлиб ўтди ва Жидданинг яна бир клуби — «Ал-Аҳлий» бир пайтлар «Бунёдкор»ни ютган (4:0), кетидан ҳаялламасдан «Пахтакор»га ютқазган (1:2) жамоа — Даммамнинг «Ал-Иттифоқ» клубини қабул қилди.

Гарчи ушбу кубок ғолибига қитъа турнирлари учун йўлланма берилмаса-да, йирик ютуқ жамғармаси жамоаларни муросасиз курашга чоғлайди.

Хуллас, Жиддада бўлиб ўтган учрашувда ҳам шаҳарнинг иккинчи клуби финалсиз қолиб кетди. Учрашувнинг 23-дақиқасида даммамликлардан Ҳамад ал-Ҳамад ҳисобни очди. Мезбонлар 71-дақиқага келигина жавоб тўпини киритишди: гол муаллифи — Амад ал-Ҳусний. Ҳаммаси қўшимча 15 дақиқалик бўлимлар ва пенальтилар сериясига қараб кетаётган бир пайтда, учрашув якуни бошқача кўриниш олди...

Жиддаликлар ўз жарима майдони ичида рақибларга нисбатан қоидабузарлик ишлатишди. Узоқ тортишувлардан сўнг 90+6-дақиқада Себастьян Тальябуэ пенальтидан гол киритиб, учрашувга хотима ясади.

АЛ-АҲЛИЙ – АЛ-ИТТИФОҚ 1:2 (0:1)
Голлар: Амаж ал-Ҳусний (71) — Ҳамад ал-Ҳамад (23), Себастьян Тальябуэ (90+6-пен).

Энди Валиаҳд Шаҳзода кубоги финалда «Ал-Ҳилол» ва «Ал-Иттифоқ» баслашади. Учрашув ўтадиган кун ҳали эълон қилинганича йўқ.