Ўзбекистон Республикаси Президенти Шавкат Мирзиёев томонидан илгари сурилган беш муҳим ташаббусни ёшлар орасида кенг тарғиб қилиш, ёш авлодда соғлом турмуш тарзига бўлган эътиборни ошириш мақсадида жорий йилнинг 21-25-май кунлари “Тошкент: беш ташаббус ҳаракати-2021” ёшлар форуми ўтказилди.

Форум доирасида мини-футбол мусобақаси ҳам ташкил этилди. Ўзбекистон Республикаси Туризм ва спорт Вазирлиги, Тошкент шаҳар ҳокимлиги, Ўзбекистон футбол ассоциацияси ҳамда Ўзбекистон Профессионал футбол лигаси ҳамкорлигида ўтказилган мини-футбол мусобақасида 32 та жамоа ғолиблик учун баҳс олиб борди. Мусобақа умумий ҳисобда 300 нафардан ортиқ ёшларни қамраб олди ва қизиқарли курашларга бой тарзда кечди.

Пойтахтимизнинг Алишер Навоий номидаги Ўзбекистон Миллий кутубхонаси, “Hyatt Regency” меҳмонхонаси ҳамда Ёшлар ижод саройи оралиғида барпо этилган шаҳарча майдонида бўлиб ўтган ўйинлар якунига кўра Олмазор туман Қуёш маҳалласи ёшларидан иборат “Ювентус” жамоаси ғолибликни қўлга киритди.

Мусобақа сўнгида ғолиб жамоа билан ўзбек футболи афсоналари ўртасида кўргазмали учрашув ҳам ташкил этилди. Унда Равшан Эрматов, Зайниддин Тожиев, Анвар Ғофуров, Сервер Жепаров, Игнатий Нестеров, Марат Бикмаев ҳамда Азиз Ибрагимов иштирок этиб, ёш ҳаваскор футболчиларга олам-олам қувонч улашишди.