Кеча Бирлашган Араб Амирликлари футбол федерациясига қарашли майдонда янги чемпионатга Дубай шаҳрида тайёргарлик кўраётган «Шўртан» клуби Бирлашган Араб Амирликлари аралаш терма жамоаси билан баҳс олиб борди.
Мезбонлар аралаш терма жамоаси таркибида кеча Ўзбекистон аралаш терма жамоасига қарши майдонга тушган айрим футболчилар ҳаракат қилишди. Масалан, дарвозани Мажид Носир қўриқлаган бўлса, Валид Аббос, Абдулла Муса, Маҳмуд Ҳамис, Исо Аҳмад ва бир қатор футболчилар ҳаракат қилишди.
«Шўртан» жамоаси эса қуйидаги таркиб билан тўп сурди: А. Корнейчук, А. Алиқулов, Ҳ. Каримов, Р. Бердимуродов, О. Жўрабоев, В. Пономарёв, Б. Қодирқулов, В. Афонин, Т. Соро, И. Таран, В. Клишин.
Заҳирадан майдонга тушганлар: М. Наумов, А. Жўраев, С. Шомуродов, Ғ. Рахмонов, А. Амонов, Л. Убайдуллаев, Ҳ. Муртазоев, И. Хазигалиев, О. Каримов.
Биринчи бўлимда асосий таркиб футболчиларини майдонга туширган «Шўртан» 1:0 ҳисобида олдинда бораётган эди. Лекин, Игорь Криушенко иккинчи бўлимга барча футболчиларни алмаштирди, фақатгина Асрор Алиқулов бундан мустасно.
Иккинчи бўлим бошларидаёқ Санжар Шомуродов майдон четлаштирилди. Қолаверса, учрашувни бошқариб борган бош ҳакам «Шўртан» дарвозаси томон шубҳали пенальти белгилади. «Кутилган совға»дан БАА терма жамоаси футболчилари унумли фойдаланишди — 1:1.
Учрашув якунига етиб бораётган паллада майдон марказида «Шўртан» футболчисига нисбатан БАА футболчиси қўполлик қилди. Барча футболчилар ҳакам ҳуштагини чалади, деб турган паллада, кутилмаганда ҳакам ўйинни давом эттириш кераклигини кўрсатди. Натижада, Михаил Наумов билан бирга-бир вазиятга чиқиб борган Абдулла Қосим «Шўртан» дарвозасини ишғол этиб, жамоасигағалаба келтирди.
Энди «Шўртан» футболчилари кейинги учрашувни 2 феврал куни Хитойнинг «Дальян Шайд» клубига қарши ўтказади.
