Лондоннинг «Арсенал» клуби Мадрид «Реал»ининг бразилиялик ҳужумчиси Родриго билан боғлиқ вазиятни диққат билан кузатмоқда. Бу ҳақда Topskills Sports UK хабар берди.
Манбага кўра, «канонирлар» 25 ёшли футболчининг «Реал»даги келажаги ҳозирча ноаниқ бўлиб тургани сабаб трансфер имкониятини кўриб чиқмоқда.
Айни пайтда Родриго жароҳатдан тикланиш жараёнини ўтамоқда ва унинг майдонга қайтиши декабрь ойида кутилмоқда.
Шу билан бирга, «Арсенал» футболчига қизиқиш билдираётган ягона клуб эмаслиги ҳам қайд этилган.
Родриго 2019 йилдан бери «Реал» шарафини ҳимоя қилиб келмоқда. Жорий мавсумда у ҳали бирор марта майдонга тушмаган.
Бразилиялик ҳужумчининг «Реал» билан амалдаги шартномаси 2028 йил июнь ойи охирига қадар мўлжалланган.
