14 феврлаь куни илк бор ташкил этилаётган 21 ёшгача бўлган терма жамоалар ўртасидаги Осиё чемпионатига қуръа ташлаш маросими бўлиб ўтади.

Ҳозирга қадар унда иштирок этиш истагини ОФКга аъзо 46 давлатдан 39таси билдирганди. Сўнгги олинган маълумотга кўра улар сони 41тага етди. Афғонистон, Бутан, Бруней, Гуам ва Мўғулистон мамлакатлари турли сабабларга кўра саралаш турнирида иштирок этишмайди.

Қуръа олдидан мамлакатлар саватчаларга жойлаб чиқилади. Бунда 19 ёшгача бўлган терма жамоалар ўртасидаги сўнгги Осиё чемпионати натижалари инобатга олинади. Қўшимчасига иштирокчи 41та мамлакат шарқ ва ғарб зоналарига ажратилади (худди ўсмирлар ва ёшлар ўртасидаги Осиё чемпионати каби).

Алексей Евстафеев бошқарувидаги Ўзбекистон терма жамоаси саралашга қуръа ташлаш маросимида 1-саватдан жой олади. Бунга сабаб қилиб Марат Кабаев мураббийлик қилган Ўзбекистон ёшлар терма жамоасининг сўнгги Осиё чемпионатида чорак финалга қадар етиб борганини кўрсатиш мумкин. Ўшанда вакилларимиз гуруҳ миссиясини муваффақиятли якунлаган ғарбий минтақанинг уч аъзосидан бири бўла олишганди (биздан ташқари БАА ва Саудия Арабистони ёшлари ҳам чорак финалга йўл олишган).

Регламентга кўра 41 мамлакатнинг 18таси ғарбий, қолган 23таси эса шарқий минтақа вакиллари ҳисобланади. Шу тариқа ғарбий минтақада 3, шарқий минтақада 4та гуруҳ ҳосил қилинади ва бир гуруҳда 6тадан терма жамоа қитъа чемпионати учун кураш олиб боради.

Ўзбекистон жой олган ғарбий минтақада 6та сават бўлади. Ҳар бир саватдан 3тадан иштирокчи жой олади. Шу тариқа сўнгги Осиё чемпионатида чорак финалга қадар етиб борган Саудия, БАА ва Ўзбекистон термалари илк саватда эътироф этилишади. Ғарбий минтақанинг қолган мамлакатлари эса кейинги саватларда бўлади. Улар қуйидагилар: Баҳрайн, Эрон, Ироқ, Иордания, Кувайт, Қирғизистон, Ливан, Оман, Фаластин, Қатар, Сурия, Тожикистон, Туркманистон, Вьетнам ва Яман.