Кеча "Пахтакор" Аҳмад-ҳожи Қодиров хотирасига бағишлаб ўтказилаётган мусобақада Харьковнинг "Металлист" клубини пенальтилар сериясига кўра мағлуб этган бўлса, "Нефтчи" Польшанинг "Полония"си устидан ғалаба қозонди. Бокуликларнинг 2та голини Насимов киритган бўлса, битта гол Жавид Имомвердиев ҳисобига ёзилди.

Натижада "В" гуруҳининг тўрттала жамоаси ҳисобида 3 очко мавжуд ва уларнинг барчаси финал йўлланмасини қўлга киритиш имкониятига эга.

"Полония" бош мураббийи Яцек Зелински сўнгги тур ўйинлари олдидан azerisport.com сайтига берган интервьюсида қуйидаги фикрни билдириб ўтди.
— Биз "Металлист"ни мағлубиятга учратишимиз мумкин, "Нефтчи" эса — "Пахтакор"ни. Шунда озарбойжонликлар финалга чиқишади. "Нефтчи" бизга қарши ўйнагандек ҳаракат қилса, "Пахтакор"ни мағлуб этади, — деди Зелински.

Ушбу мусобақанинг гуруҳ босқичида дуранг натижа қайд этилса, жамоалар ўйиндан кейин пенальтилар сериясида иштирок этишмоқда. Польшалик мураббийи бу ҳақда ҳам фикрини билдирди.
— Бундай схема остидаги мусобақаларда иштирок этганман. Албатта, бу — қийин, лекин қизиқарли. "Нефтчи" билан ўйинда бу қоида бизга ёрдам бериши мумкин эди, агар ҳисобни тенглаштира олганимизда. Энг сўнги бўлиб ўлади, деганларидек, охирги дақиқаларгача дуранг бўлишига умид қилдим. Лекин мен кутган нарса содир бўлмади, — дейди Зелински.