Мадриднинг "Реал" клуби "Севилья" ҳимоячиси Жюль Кундега қизиқиш билдирмоқда, деб хабар беради le10sport нашри. Манбанинг хабарига кўра, янги бош мураббий Карло Анчелотти Кундени сотиб олиш "Реал" яқинлашиб келаётган ёзги трансфер ойнасида амалга ошириши керак бўлган биринчи трансфер деб ҳисобламоқда.
Қайд этилишича, 22 ёшли французнинг трансфери "Қироллик клуби"га 80 миллион еврога тушиши мумкин. Бундан ташқари "Реал" "Вильярреал"дан Пау Торрес вариантини ҳам кўриб чиқмоқда. 2020/21-йилги мавсумда Кунде "Севилья" таркибида 49 та ўйин ўтказиб, 4 та гол ва 1 та голли узатмани амалга оширди. Трансфермаркт портали футболчининг қийматини 60 миллион еврога баҳоламоқда.
