Анъанавий тарзда ўтказиладиган Халқаро Кенгаш йиғилиши санаси маълум бўлди. Ташкилот ФИФА қошида фаолият юритади ва футбол қоидаларига ўзгартиришлар киритиш, мукаммаллаштириш билан шуғулланади. ФИФА нинг маълум қилишича, йиғилиш 3 март куни Англияда бўлиб ўтади.
Ташкилот асосан 3-қоидага («Ўйинчилар сони») ўзгартириш киритишни, яъни қўшимча вақт белгиланганда тўртинчи футболчини захирадан майдонга чиқаришга рухсат беришни тарғиб қилмоқда.
Бундан ташқари, инглизлар 4-қоида («Ўйинчилар экипировкаси»)нинг гетраларни мустаҳкамлаш учун ишлатиладиган ёпишкоқ лента рангига оид бандларига ўзгартиришлар киритилишини, хусусан лентанинг ўлчамлари қандай бўлишидан қатъи назар, у гетранинг кайси кисмига боғланса, ўша жойининг ранги билан мос бўлишини талаб қилишмоқда.
Шунингдек, 12-қоида («Қоида бузиш») ҳам кўп йиллардан бери муҳокама қилиб келинаётганди. Ниҳоят, ФИФА бу борада ҳам ён беришга тайёр — баъзи вазиятлардаги «уч карра жазоланиш» ҳолатларидан воз кечилади. Мисол учун, агар ҳимояланувчи томон рақибига қарши жарима майдони ичида қўполлик қилса, яъни гол уриш имкониятидан яққол маҳрум қилса, бериладиган жазо ҳаддан зиёд қаттиқ эди. Пенальти белгиланади, футболчи майдондан четлатилади, ўша футболчи кейинги ўйинни ўтказиб юборади. Илгари бундай ҳолатлар кўпинча, тўп қўл билан атайлаб ўйналганда, пенальтига олиб келадиган яққол қўполлик ишлатилганда содир бўлар эди.
ФИФА бу борада фақат қўл билан ўйнаш ҳолатидаги қоида бузилишини шундай қаттиқ жазолаш фикрида қолади ва яна икки ҳолатдагина тавсия қилади.
Биринчиси, яққол голдан сақлаб қолган қоида бузилиши жарима майдони ташқарисида содир бўлса. Чунки бу ҳолатда пенальти белгиланмайди.
Иккинчиси, ҳимоячи томонидан тўпга ўйнаш имконияти умуман қолмаган вазиятларда. Мисол учун, ҳимоячи тўпга улгурмайди ва рақибни тўхтатиш мақсадида атайлаб чалиб йиқитади ёки қўли билан итариб юборади.
Бошқа ҳолатлар — тўпга ташланган дарвозабоннинг, улгурмасдан, ҳужумчини йиқитиб юбориши ёки «оёқ ташлаган» («подкат»ни амалга оширган) ҳимоячининг бироз кечикиши натижасида содир бўлган қоида бузилишлар қизил карточка билан жазоланмайди. Фақат пенальти белгиланади ва сариқ карточка билан кифояланади.
Бундан ташқари, кун тартибида қўшимча ҳакамлар борасидаги экспериментлар хулосалари ва янги технологияларни олиб кириш масалалари ҳам кўриб чиқилади.
