Тошкент давлат транспорт университети спорт соғломлаштириш комплексида «Баскетбол фестивали-2021» бўлиб ўтмоқда. 12 июнь куни мазкур фестивальнинг очилиш маросими ўтказилди.

Ўзбекистон Баскетбол федерацияси томонидан ташкил этилган ушбу фестивальда юзлаб томошабинлар ўз оилалари ва яқинлари билан иштирок этишди.

Фестиваль доирасида баскетболнинг Open Cup 3х3 таснифига кирувчи Ўзбекистон кубоги баҳсларига ҳам старт берилди. Турнирда юртимизнинг барча вилоятларидан ташриф буюрган 16 ва18 ёшгача бўлган ўсмир йигитлар ва қизлар ҳамда 18 ёшдан катта эркак ва аёллар жамоалари иштирок этмоқда.

Турнирнинг дастлабки, 12 июнь куни саралаш ўйинлари тунги 23:00га қадар давом эттирилиб, 16 ва 18 ёшдаги ўсмир йигитлар ва қизлар жамоаси финал чипталарини қўлга киритдилар.

Бугун, 13 июнь санасида эса Олимпида дастурига киритилган ушбу спорт тури бўйича финал ўйинлари бўлиб ўтади. Бундан ташқари бугун, кун тартибидан катта спорт шоуси, кўнгилочар дастурлар, болалар учун қизиқарли ўйинлар ташкил этилиши ҳам ўрин олган.

Қайд этиш жоиз, ушбу турнирнинг финал баҳслари соат 21:00 дан бошлаб «Спорт» телеканалида тўғридан-тўғри эфирга узатилади.

Ташкилотчилар бугун, якшанба, дам олиш кунини мароқ билан ўтказиш учун Тошкент транспорт университети спорт майдонларида ўтказилаётган катта турнирга барчани таклиф қилади.