Toshkent davlat transport universiteti sport sog‘lomlashtirish kompleksida «Basketbol festivali-2021» bo‘lib o‘tmoqda. 12 iyun kuni mazkur festivalning ochilish marosimi o‘tkazildi.
O‘zbekiston Basketbol federasiyasi tomonidan tashkil etilgan ushbu festivalda yuzlab tomoshabinlar o‘z oilalari va yaqinlari bilan ishtirok etishdi.
Festival doirasida basketbolning Open Cup 3x3 tasnifiga kiruvchi O‘zbekiston kubogi bahslariga ham start berildi. Turnirda yurtimizning barcha viloyatlaridan tashrif buyurgan 16 va18 yoshgacha bo‘lgan o‘smir yigitlar va qizlar hamda 18 yoshdan katta erkak va ayollar jamoalari ishtirok etmoqda.
Turnirning dastlabki, 12 iyun kuni saralash o‘yinlari tungi 23:00ga qadar davom ettirilib, 16 va 18 yoshdagi o‘smir yigitlar va qizlar jamoasi final chiptalarini qo‘lga kiritdilar.
Bugun, 13 iyun sanasida esa Olimpida dasturiga kiritilgan ushbu sport turi bo‘yicha final o‘yinlari bo‘lib o‘tadi. Bundan tashqari bugun, kun tartibidan katta sport shousi, ko‘ngilochar dasturlar, bolalar uchun qiziqarli o‘yinlar tashkil etilishi ham o‘rin olgan.
Qayd etish joiz, ushbu turnirning final bahslari soat 21:00 dan boshlab «Sport» telekanalida to‘g‘ridan-to‘g‘ri efirga uzatiladi.
Tashkilotchilar bugun, yakshanba, dam olish kunini maroq bilan o‘tkazish uchun Toshkent transport universiteti sport maydonlarida o‘tkazilayotgan katta turnirga barchani taklif qiladi.
